Rawllai ka di

“Khawia’n tuan maw?’ tiin zirpui lenrual hlui te,
Zah pawh dawn zo lo vin zawtin ka zawng che a;
Saw raltiang vangkhuaa’n tuanin a leng an ti,
Ka hmangaih enchim loh, ka tan vul zel che  maw?

Tawn leh ka nuam ngei e aw, rawllai ka di te kha,
A chamreng thin thinlaia’n, thiamna run khat bel a;
Dar ang kan lenlai ni te, kohkir leh theih ni si lo,
Hlimtea kan lenlai hun a van rei lo tak em.

Chhemdam thlifim dam te’n nem te’n va leng zel la,
Ka di thlan dartui luang nem te’n lo chhem dam la;
Hliahtu van rang chhum, aw, muang te’n zing cham rih la,
Turni sensa hnuaia tuanrel ka di hliahin.

Aw, thian koh thiam huiva thlawkin va leng ta la,
Ka di runsang belin ti hian min va hlan la;
“Nang ngai suihlunglengin chhin zai a rel thei lo,
Hram thiam rimawi tin paw’n an hnem zo lo,” tiin.