A lo tawk reng e
Hla Thu (Lyrics)
Phuahtu: Lalruatfela Pachuau
Satu: Lalruatfela Pachuau
Sual sipai ral lian nen nitin hnehna chang turin kan indo,
Thih theihna tur hmangin min bei, suala hliamin ka lo chau a;
Mahse, Lalpa’n min thlamuana, ralthuam famkim mi rawn thuam a,
Sual Setan ral hnenhin ka ngam leh ta a ni.
A remruata innghat ringtu nun chu, vuina tur reng a awm ngai lo,
Lei damchhung ni lungngaih, buaina, bawrhsawm, mangan lo thleng mahse;
A remruat hi kan tan a lo tawk reng e.
Chatuan roluah pui ve turin hmangaih vangin min tlan tawh a,
A hmangaihna thisen hlu chu engmah reng hian a man zo lo;
Chatuan pialral kawng min hawnsakna thisen lui thianghlimah chuan,
Kei mi sual, riangvai, rethei hi min bual ve ang che.
I tel lo chuan, aw, Lal Isu, kan lenna thlalerah hian,
Sual Setan ral lian avangin ngui leh chauvin kan rum thin a;
I ram mawi par min thliah ve la, chatuan daih tur hawi lo par ngei,
Nunna tui nung lung loh tui dawn ka nghakhlel e.