Sikni eng zing thiang karah

Phuahtu: -
Satu:

Satu: Jonathan Lianhna

Sikni eng zing thiang karah dai nemin hnah hring luan e;
Ruam bawh chhum zing riai e, tur ni her san hma zawng,
Thang van sang a thiang ngei e, sirva hram an mawi chuang e,
Eng dang reng hian kei zawng thinlai a luah thei lo,
Tlangsam par leh hlu pawn tlang tin a mawi ngei e,
Nungcha tin chiar nghian sikni eng lawmin,
Chatuan Pathian anchhia dawng tawh hringfa leng te,
Hlim te’n kan nuih za leh theih nan.

Nat vang laikhum zal te leh thir bang phena awm te,
Awmlai lusun vanga thinlung nguia chau te;
Rairah vanga thinlai na, rualban zo lo te pawhin,
Hun khatah sikni eng leh Lal piang chu kan lawm,
Chan tawk a tlei zo lo hringnun hmang mek tan chuan,
Khuarel thinlai ti na mai lo ni e,
Mahse, hei ber hian maw thinlai lo luah sela,
Van Lal fa thilpek ropui hian.

Aw, nang Maka, Remruattu, Remna Lal lo pianga chuan,
Ka thinlung min hneh la khawvar hun thlen thlengin,
Ka thinlung lai ril ber hian chibai a buk a che,
Remna Arsi ka tan nunkawng hruaitu ni se,
Sikni eng lo thleng hian i hmangaihna mak chu,
Ka thinlungah tharin min hrilh nawn se,
Chutin nau lo piang chu chibai tha ber buka,
Ka thinlung ka hlan ve theih nan.