Nang nghilh nan
Hla Thu (Lyrics)
Phuahtu: Parmawii
Satu: Apuii Chhangte
Nang nghilh nan hian thangvân mawina leh,
Siâr mawina te ka nghilh a ngai âwm e;
Nang nghilh nan hian vangkhua mawite leh lam inrin kawi te,
Hmu lo turin ka chhingmit chhînga ka hup a ngai awm e.
A har dâwn mang e, a thar nawn zel e,
I lo lang leh ṭhin chhingmitthlaa’n;
Lehkha phêk chhinchhiahna ianga kan sulhnute,
Ka han phêk lêtin i hming a lang ṭhin.
Nang nghilh nan hian ka silhfen mawite leh,
Ka thuam mawi i tih zawng te ka dah ṭhat ngai âwm e;
Nang nghilh nan hian kan hlimthla hlui leh kan lehkhathawn te,
Lang lo turin ka thingrem mawngah ka dah ṭhat a ngai âwm e.
Nang nghilh nan hian ka benga ri lût zawng te,
Ka chhingmita langte ka hawisan a ngai awm e;
Nang nghilh nan hian ka ṭingṭang ṭap ri leh ka ziakfung rûm rî pawh,
Zawm loh turin hre reng chunga hriat loh a ngai âwm e.