Aw, van thli ka ngai em che lo leng rawh
Hla Thu (Lyrics)
Phuahtu: R.L Kamlala
Aw, van thli ka ngai em che lo leng rawh,
Ka thinlunga chhumpui zing chhem kiang rawh;
Thim leh lungngaihin kei mi nang vel a,
Ka pan lai chatuan pialral khi a hliah.
Aw Lalpa, ka tan engkima engkim,
Nunna tuikhur i ni ka ngai a che;
Ropuina leh van hmun ka dil chuang lo,
Van chu nang i lo ni e, min awm rawh.
Hmanah chuan Eden par tlana leng hnu,
Kan vai e khawvel sual leh thim zingah;
Mahse, Kalvari tlanga lengte zawng.
Chatuan ram Eden thar nuam khian a au.
Lei pangpar a vulte zawng an lo chuai,
An lawm hla leh an ri mawi pawh a reh;
Aw ka Lal, i hmel erawh a chul lo,
Min hnem a’n chatuanin a vul zel ang.
I hming ka kohvin thim a lo kiang thin,
Thlaler ram khawhar hi zaiin ka awi;
Ka lawmna a thar zel ka hril seng lo,
I engin ka tan khua a var ta e.