Doral lian
Hla Thu (Lyrics)
Zofa zaleng rual zingah hian,
Doral lian hringfate hmelma a hrang zel a;
Tleitir lungmawl a man zel thin,
Ram tin, hmun tin a fang zel a,
Nun par thliakin, lenlai par tlan chung zelin,
Zamual an liam leh thin.
Mahte’n ka dawn thin he lei hringnun hi,
Chun leh zua duatlai tleitir leng zawngte hi;
Lenlai par tlanin hlimin leng thin mahse,
Mual an liam zel thin dairial chang turin,
Kohkir theih ang chang tawh si lo,
Dawihlo bum vang hianin maw piallei thim an belh tak le.
An sakhmel mawi a ngui riai mai,
Zirna run in belh zai an rel thei tawh si lo;
An lawmna ber lungkham vang hian,
An sum leh pai, an neih zawng nen a ral zel thin,
Duat tea lo chawi liantu hnutiang an chhawn leh thin.
Chun leh zua nun a ngui ruai e,
Ti maia nun hmanral mai zawng tuar har an ti;
Zofa tleitir lungmawl te u, in nun kalsiam her sual zel hi thlir ve teh u,
Lunglai chhira hnutiang chhawnin lo kir leh rawh u.
Mahte’n ka thlir thin he lei hringnun hi,
Chun leh zua duatlai tleitir leng zawngte hi;
Lenlai par tlanin hlimin leng thin mahse,
Mual an liam zel thin dairial chang turin,
Kohkir theih ang chang tawh si lo,
Dawihlo bum vang hianin maw piallei thim an belh tak le.