Hmana kan nun hlui

Phuahtu: Rokunga
Satu: Mission Veng YMA North Branch Zaipawl

Hmana kan nun hlui a chul tawh hnu,
Ka dawnin awmkhua a har ngei e,
Chhungkim dar ang lenlai ni te zawng kha;
Mual an liam, hmanlai an chang zo ta,
Lung min len tinkim ka dawn khawlin.

Kawl a ngui, tlaini a herliam a,
Rial ang lo dai e, i run kaina,
Zantlai bawhar mah hi siang a lawi thin;
Han hawi ve ang che i run kaina,
I sulhnu rial anga dai hnu hi.

I hlimthla te mai hi kan chan tawk,
I anka biak leh mi chhang si lo,
Ka thlir ang che awmkhawhar min hnema’n;
Ka ngai che, bawihte, ka ngai em che,
Min hnem an awm lo ve – nang lo chu.

Hmanah chuan run hmuna leng kan ni,
Tunah erawh kar mi lo dan ta,
Chatuan tlang lianin mi dang ta si a;
Ka lenna hringmi khawvelah hian,
Ka nghak lungduh hnen ka thlen hun tur,

Kei mi ngai lovin i liam ta maw?
Chung Pathian run nuam chu pan zel rawh,
Tah chuan hmangaih Lal i han hmu ang a;
A lo chhang ang che hmangaihnain,
Angel lenna chung Pathian runah.

Chung Pathian run nuam chu thleng ila,
Lungduh ka then takte kiangah khian,
Luaithli nul inthente kan hlau tawh lo’ng;
Mittui tlak Lalpa’n a phal tawh lo,
Hmangaih Lal rorelna hmun a ni.