Ka lunghahna hmun pawh chhandamtu

Innghahna tur zawngin ka van ruai ruai a,
Neih sum ro sengin chawlhna ram thlir in;
Ka hmu zo si lo khawvel ram zauvah,
Hringnun lei ramah a awm lo em ni?

Hahchawlhna ramhlun tur Kalvari tlangah,
Isuan a siam zo mualpho tawp tuarin;
I tan a thi a tholeh Isua chu,
I rochan hluber nunna a ni e.

Rochan ka nei lo, khawvel ramah hian,
Min siamtu rochan ka lo ni zawk;
Innghahna tur dang reng ka nei chuang si lo,
Ka lunghahna hmun pawh chhandamtu a ni.

Hnuchhawn ramhlui ngaiin i hawikir em ni?
Duhamna sual bawih a bo pil mek te;
Nulat tlangval sual nawm chen khur chhunga,
Bo pil zo mai tur i ngaisang em ni?

Ka ngaisang thei tawh lo chhandamtu vangin,
Ka nun ka neih zawng atan ka hlan si;
Sual bawih a kir leh boral mai tur chuan,
Nunhlui ram ngaiin ka hawikir tawh lo’ng.

Reilote dam tura khawvel parmawina,
Neih sum ro chen a tlaipuar tum mek te;
Beidawng, mangang authawm ri i hria em?
Chhanchhuak tur a koh i ni ve lawm ni?

Nun tam tak min pe a chhandamtu Lalpa’n,
Riangvai chanv tur rohlu Isua chu;
Krista aia ding palai kan ni si,
Chhanchhuahna kraws thu ka hril bang lo’ng e.