Lungrualpui turin

Thilsiam tinreng tunhma tunhhnu ka thlir a,
An awmdan reng ah chuan an mawi ka ti;
Hringmi zaleng thilsiam engkim chung a leng,
An mawi ka ti suihlung an rual ni chuan.

“Sem sem dam dam, eibil thi thi” an lo ti,
Lak aiin pek in lukhawng a keng;
Mahni sanah zaleng tlangtin a tuan te,
I sawm ang u lungtin rual pui turin.

Lalthutthlengah tunge thut hlen lo tum le?
Ramdang chungah inhrawt lal tum tu chu;
A tawk te in khua in a rel an lo ti,
Tupawh mai hian talent bik kan nei si.

Lei lalte u, pian in murna bih chiang ru,
In lem chuanglo Adam thlah tho inni;
Chi intihbing, tualthah, mangan, thlabar nen,
Mahni hmasial vang mai a lo ni e.

Aw hnamte u, mingo, mieng, midum te,
Inpeng tawn in tap te tahpui ula;
Intello chuan pumkhat zai kan rel thei lo,
Rel thang chhumpui zawng chu vai kiang rawh u.