Nghilh loh rose par

Phuahtu: Darpuii Sailo
Satu: Famkima

Ka hawi vel a, a lang e aw, Darkhawzopui,
Ka nau thlafam channa vangkhua rihnim tlang nen;
Ami leng te’n tlawmngaihna par silh puan mawi nen,
In lo hlan maw, a mawi ngei e, tlang tin mual tin,
Hmana ngur kan lenna vangkhua, 

Theih chang se aw, chuan ka nuam e, hnim khaw daiah.

Ka tir ang che, huiva len thiam,
Thlawkin lengin va kal ta la;
Ka nau zalna pialleiah sawn,
Nghilh loh rose par va hlan ang che,
Ka chawi ang che, len thiam huiva.

I riang chuang ngei, ka nau Mate, Hnim khawdaiah,

Dawi ang dawmtu awm lo vin maw chhawl thing hnuaiah;

Fam i chan le, a na em mai, aw, kan tuar hi,
Fam zun lengin min phuar vel e, i liam ni khan,
Tah lai reng kan bang thei lo ve,
Tlai khua kan var, riakmaw valeng iang kan vai e.

Chunnu thinlai a fan zo lo, fam i chang hi,
Tah zai reng a rel thei lo ve, ar ang a  vai;
A zawng ruai ruai, a tawng si lo, lunglam a vai,
‘Mate khual kal, a lo hawng dawn’ tiin a nghak,
Han dawn chiang teh, aw ka chunnu,
A pawi em mai, tlang za relthang kan phur mai dawn.

Chunnu chawi lai vul lai a thliak mai ta si a,
A tuar zo lo, aw, ka chunnu fam a chang ta;
Kan run chhung pawh a ngui zo ta, i tel lo chuan,
Khuavang kallai em ni? Vangkhua a ngui ruai e,
Eng kan ti nge, kan sang ta lua em ni?
Min ngaidam rawh, kan ngai che, ka chunnu.