Suihlungruala kan inkhawmin
Hla Thu (Lyrics)
Phuahtu: B Sangmawia
Satu: MTKP 2013 Inkhawmpui Zaipawl
Suihlungruala kan inkhawmin,
Lal fak zai vawrin kan leng za;
Mahse, hun leh nite her liamin,
Lungduh kan inthen leh si thin.
Kan tuanna tlanngte lo dangin,
Mualzapui kar dan pawh nise;
Intawngtaisak tawnna vawng zelin,
Thinlungah inhre reng ila.
Inthenna te lo awm mahse,
Lenna tlang dangin,
Kawng ralti, ramrehah pawh,
Kan himna Krista chu vuan ila,
Nitin a hniakhnung zui zelin,
Thenna nite’n mual an liam ang a,
Lalpa’n min hruaikhawm leh ngei ang.
Krista hmangaihna hrui vuanin,
Harsat, mangan lo thlen pawhin;
Infuihtawnna biahthu hlan zelin,
Ritphurh inchhawk tawn zel ila.
Intihsiakna tha chu beiin,
Ramtiam lam chu i pan zel ang;
Hnehna Chanchintha chu puang zelin,
Kan tum ram kan thlen hma loh chuan.
Lungduh inthenna khawvelah,
Tawn leh ni awm tawh lo mahse;
Kan chatuan hmun Van khawpui mawiah,
Kan la intawkkhawm leh ngei ang.
Krista-a unau duh tak te,
Lalpa awmpuina chang zel la;
Kan intawh leh ni a thlen hma zawng,
Lalpa’n min veng tawn zel rawh se.
Kan intawh leh ni a thlen hma zawng,
Dam takin aw, dam takin le.