Zion fate lawmna ni
Phuahtu: -
Satu:
Rinnain ka han thlir a van Jerusalem thar khi,
Buaina ten a chim phak loh engthawlna khawpui a ni;
Chhun leh zan a awm tawh lo, Beramno hmel engin,
Khawpui chhung a en vel e, a mawi, a mawi mang e.
Khawvelah hian thlemna ten nitinin min hip thin a,
A par rimtui leng velin min bawm vel thin mahsela;
Krista phatsana nawmchenna hlimpui ai chuanin,
Ka thlang zawk e rinawmna vanga hrehawm tuar pawh.
Damlai ni a tlak hunin Beramno engah chuan,
Lawmna chuai thei lo changin ka leng ve ngei ang a;
Aw, a va hlimawm dawn em ka nghakhlel e kei zawng,
Zion fate lawmna ni tunah hian lo eng tawh rawh.
Ka Lalpa hnungzui tur hian ka theihna zawng zawngte hi,
A tan chauh ka hlan tawh ang ka phatsan leh tawh lo vang;
Harsatna engpawh thleng se a hming avang chuanin,
Thih thleng rinawm takin, ka tuar, ka tuar zel ang.
Tunlaia tuarnate hi kan ropuina tur nen chuan,
Tehkhin tham a ni si lo, chhel takin i tuar zel ang;
Krista vanga tuartute tana lawmna ni turin,
Chungtiang an chatuan lenkawl a lo eng dawn ta e.