Ka lungkham ram
Hla Thu (Lyrics)
Lei hrehawm buaina piah lamah khian,
Ka lungkham ram engmawi chu a awm;
Kan mi ngaih lungduh kal hmasa ten,
Beram no hliam hnu zaiin an awi,
Hnutiang lam sul ang hawi tawh lo vin,
Chhandamtu kiangah angel var te nen,
Hlim takin an leng ka Lal ramah khian,
Kei zawng ka thlirin ka lung min len e.
Aw kawt laiah nunna tui a luang,
A luikam tual ka nunna thing kung;
Chi hrang sawm pahnih thlakipin a rah,
A hnah te chu hnam tin damna a ni,
Beram no lalthutphah en velah khian,
Aw, Halleluiah, chu tlang thianghlimah chuan,
In tihnatna reng reng a awm ngai tawh lo vang.
Ka Lal ramah khian ni eng a ngai lo,
Beram no thianghlim an khawnvar a ni;
Chu hmuna leng mi thianghlim te chu,
An hmel ni angin a eng a ni,
Lei hrehawm ram hi ngai tawh lo vin,
Nunna thing daihlim Lalpa an bel,
An thawhrimna zawng zawng chawlhsanin,
Nunna tui kamah muang ten an chawl.
Chu ramah sual ral hnehtu leh
Beram no nunna bu a hming chuang te;
Lal sipai huaisen martar te chuan,
Chawimawina lallukhum an khum tawh ang,
Chhandamtu hming vanga sawi tam tlang rel,
Hrehawm tinreng an phurh zawng te,
Hliamna ban ser tam tak puin,
Chhandamtu hnenah an hril ve ang.
Kei pawh ka damlai ni a tlak hunin,
Ram ni tla ngai lo Zionah khian;
Beram no hnehna hla mawi sa in,
Kan hmangaih lungduh kal ta te nen,
Lei hrehawm ngai lo vin kan leng za ang,
Thenna biahthu reng kan sawi tawh lo’ng,
Chatuanin van arsi te ang khian,
Kumkhaw tlai tluanin kan eng tawh ang.